Veciños, Asociacións, e Partido Popular piden a paralización urxente da obra no contorno da Veracruz

NON FAI FALTA QUE COMAS ALLOS

Hai que ver ata onde chega o cinismo e a caradura de algúns, e sobre todo de aqueles que agora van de defensores do patrimonio sendo herdeiros, até con apelidos, de aqueles outros que gobernaron a vila anos e anos (perdón, décadas e décadas) e permitiron afogar a xoia que agora queren defender co urbanismo máis atroz e salvaxe da historia de todo o estado español (se exceptuamos as torres de apartamentos ou hoteis, que non deixa ver o mar, da maior parte das costas do sur e do levante). Si a máis salvaxe, exemplo en tódalas universidades de como non se debe facer xamais en urbanismo. Os mesmos que deixaron construír o adefesio que está entre a Casa do Concello e o "Plaza". Os mesmos que deixaron facer a monstruosidade que hai tralo consistorio ou que permitiron as irregularidades no "Rogelia" que outros teñen que tragar? Eses van agora de puristas e protectores? De que? Queren protexer tamén o gran no... que significa o chalé que hai nas Barcias? Sexamos serios e, se hai que derrubar o muro e facer un proxecto novo para o entorno da Veracruz, fagámolo, pero entre todos. Porque neste caso todos os partidos políticos, e digo todos, son culpábeis por omisión ao non seren capaces de ver no proxecto o que se ía facer. Por certo que o sr. Marnotes é Arquitecto Tecnico, se mal non me lembro, e non foi capaz de ver que altura ía alcanzar o muro en plano. Custa crelo, supoño que haberá planos de alzados, ou seccións, ou como mínimo cotas de altura, vamos digo eu. E, da igrexa non me gusta falar moito que logo xa se sabe, veñen as excomuñóns, pero... a igrexa que defende este entorno é a mesma que permite en milleiros de igrexas románicas de parroquias do rural adros de cemento ou panteóns enormes que tapan as propias igrexas? É a mesma que deixa caír pola súa propia ruína reitorais cun gran interese arquitectónico ou etnográfico? É a mesma que cobra por visitar algúns monumentos que din propios e que están rehabilitados e mantidos con cartos públicos? Repito, sexamos serios, que isto así o é. Estamos a falar, eu diría, do único que é capaz de facer parar a un viaxeiro no Carballiño (e non porque o vexa de lonxe que antes ve o Edificio "Veracruz", tan robusto e beis el. A min case me gustaba máis cando era azuliño e brillantiño) así que, se queremos que sigan parando aínda que non teñan máis que un sitio onde comer polbo (que non pulpo nin pulpiño nin gaitas) mans á obra, paremos a idem e que técnicos e políticos boamente unidos dean cumprida solución a algo que si o ten. Evaristo López