O Voceiro do Grupo Municipal Socialista do Concello do Irixo, Iago Fariñas Valiña, presentou as pasadas semanas unha moción para ser debatida no pleno instando ao Concello Á ADQUISICIÓN PARA A SÚA CONSERVACIÓN E POSTA EN VALOR DAS CASAS REITORAIS ABANDONADAS NO CONCELLO DO IRIXO.

O concello do Irixo, do que forman parte doce parroquias, ten a meirande parte das súas casas reitorais en auténtica ruína como a de San Cosme ou a de Reádegos , Froufe ou Espiñeira; ou en semi-ruína, como a de Dadín, Cangues ou Corneda, esta última dun gran valor artístico e arquitectónico e en continua espoliación. Xa no ano 2002 o concello anunciou publicamente a adquisición da casa reitoral de San Cosme para turismo Rural e así fora reflectido nos medios de comunicación, pero pasados, máis, de 14 anos nada se sabe da compra de ningunha destas casas reitorais que forman parte do noso rico patrimonio, aínda que non sexan propiedade deste Concello.

O Grupo Municipal Socialista, indica que estas accións se poden realizar sen prexuízo de incluír outras casas reitorais, edificacións ou terreos que puideran quedar en desuso como a do Campo, ou en estado de abandono progresivo, pero actualmente de forma mais urxente centrándose claramente na Parroquia de Cangues (Santo Estevo), Parroquia de A Cidá (Santa Mariña), Parroquia de Corneda (Santiago), Parroquia de Dadín (San Pedro), Parroquia de Espiñeira (San Pedro), Parroquia de Froufe (San Xoan), Parroquia de Reádegos (Santa Baia) e Parroquia de San Cosmede de Cusanca (San Cosmede) As casas reitorais do Concello do Irixo, conforman, en gran parte, un conxunto artístico e arquitectónico que merece, sen lugar a dúbidas, a pena ser conservado e posto en valor e uso con múltiples posibilidades.

Debido ao estado destas propiedades, e a que a Igrexa hai xa uns anos que decidiu vender algunhas propiedades en desuso e especialmente as que están en estado ruinoso ou practicamente, como é o caso das anteriores sinaladas, sería moi asumible negociar coas autoridades eclesiásticas para que o Concello do Irixo adquirise a titularidade de todas estas antigas casas reitorais para recuperalas e poñelas en valor. Todas estas casas, algunhas situadas estratexicamente e outras con enormes posibilidades segundo o caso, poderían, despois dun laborioso proceso de restauración, non so albergar espléndidas vivendas de turismo rural ou albergues, que darían un pulo importante ó concello no ámbito laboral e turístico; senón tamén poderían ser convertidas en centros culturais, dotacionais ou municipais que darían servizo social para todos os veciños e veciñas do Irixo.

Xa que logo, poderían ser puntos de ocio e reunión dos veciños de cada unha das parroquias. É, ademais, unha obriga moral non deixar que se perda o patrimonio deste concello, senón arranxalo, conservalo e destinalo para uso e desfrute dos veciños ou dotar, nesas instalacións, outros servizos a este concello, porque non esquezamos que o patrimonio do concello é dos veciños e veciñas de todas as parroquias. Debido ao seu estado de deterioro á inversión inicial non debería ser moi elevada e perfectamente asumible por este concello, sempre e cando se axuste o seu presuposto, dotando unha partida orzamentaria, ou chegado o caso, unha modificación de crédito para acometer a compra despois dunha negociación coas autoridades eclesiásticas.

A rehabilitación de todas estas propiedades, que se iría prolongando no tempo, podería contar con diversas subvencións de distintas administracións e mesmo poderían dar lugar á creación dun obradoiro de emprego, xerado polo propio concello ou en colaboración con outros concellos veciños, o que xeraría traballo e riqueza no concello.

Os socialistas, queren destacar que a negociación para a adquisición destas casas reitorais coas autoridades eclesiásticas, debería incluír espazos ou metros de terreos da Igrexa que sexan necesarios para mellorar as comunicacións ou as infraestruturas do concello. Sirva como exemplo, que coa cesión duns dous ou tres metros na fachada do destro da parroquia do Campo se podería acometer o ancheamento e a urbanización do entorno con beirarrúas, que mellorarían considerablemente o entorno e garantirían a seguridade dos peóns que actualmente circulan pola estrada para desprazarse á igrexa; ao non dispoñer, no entorno da parroquia, de accesos axeitados.

O Grupo Municipal Socialista do Concello do Irixo, presentou, hai semanas, para a súa consideración e dada a importancia da conservación e posta en valor deste patrimonio existente no concello, que ademais serviría conxuntamente con outras accións para dinamizar o turismo e a economía do concello, unha moción instado ó Pleno municipal á adopción do seguinte ACORDO: “Que o Concello do Irixo negocie coas autoridades eclesiásticas, sexa o Bispado ou quen ostente a representatividade deste para tales cuestións, a adquisición na fórmula máis vantaxosa, preferiblemente a compra, das casas reitorais existentes no Concello, deshabitadas e en estado de abandono para rehabilitalas coa solicitude das axudas das distintas administracións autonómicas, estatais ou europeas, aproveitando a rehabilitación das mesmas para a creación dun Obradoiro que xere emprego e dinamice a economía do municipio e finalmente destinalas a vivendas de turismo rural, albergues, centros culturais, dotacionais ou municipais, etc. para todos os veciños e veciñas de O Irixo.”

A Concellería de Cultura do Carballiño propón un menú de teatro, maxia e humor para desfrutar da fin de semana sen saír da vila.

O Nadal Cultural, que arrancou nos primeiros días de decembro, traerá ao Carballiño máis dunha trintena de actividades para maiores e pequenos. Nesta fin de semana, a oferta inclúe a obra teatral “Viaje al profundo norte”, de Teatro del Norte, e o espectáculo “Retranca… e maxia” do mago Luis Boyano. “Animamos á veciñanza da comarca a desfrutar da proposta cultural e a aproveitar para pasear polo Carballiño, desfrutar da nosa hostalaría e facer aquí as súas compras”, convida Diego Fernández, concelleiro de Cultura.

O sábado será a quenda de Teatro del Norte, que presentarán ás 20,00 horas no Auditorio Municipal a peza “Viaje al profundo norte”. Trátase dunha obra creada en 1987 e que neste 2025, cando a compañía cumpre 40 anos, volve aos escenarios cunha renovada proposta. Os personaxes reflexionan sobre o paso do tempo, o pasado que non volverá e os sentimentos que aparecen na vellez, como a soidade ou o medo. A entrada ten un custe de 8 euros e poderase adquirir na taquilla do Auditorio.

O coñecido mago Luis Boyano, pola súa parte, actuará no Auditorio Municipal o domingo, ás 19,00 horas, co seu espectáculo “Retranca… e maxia”, incluído na Rede Galega de Teatros e Auditorios. O artista, moi querido no Carballiño, presenta un show para público de todas as idades onde se misturan a maxia, a sorpresa e o humor para deixar ao público sen fala. As entradas pódense adquirir na taquilla do Auditorio por 5 euros.

Dia da Bici no Carballiño

O Concello do Carballiño impulsa este domingo o XX Día da Bici en colaboración con +Deporte La Región, ximnasio Korpore e club ciclista Carballiño Sobre Rodas. A actividade, gratuíta, está dirixida a poboación de todas as idades co obxectivo de desfrutar dunha xornada familiar, deportiva e divertida, na que haberá agasallos, sorpresas e animación musical.

“Este ano fixemos algúns cambios, temos tres carreiras diferentes por idades, pensadas para os máis pequenos, os rapaces e os adultos”, detalla José Castro, concelleiro de Deportes. As tres probas comezan ás 11,30 horas na Praza da Veracruz.

A carreira dos máis pequenos realizarase dentro do entorno da Veracruz; a dos rapaces (ou adultos que prefiran un percorrido máis curto) é de 4 kilómetros, con volta polo Parque Municipal, e a máis longa, de 8 kilómetros, chega a Mesego e regresa. “Quitamos a subida ao Chamoso e faremos unha volta arredor da Residencia de Tempo Libre”, indicou José Castro.

A inscrición, que permite acceder ao sorteo, pode realizarse a través da páxina Press Club La Región ou na propia Veracruz antes da saída. Porén, a participación é aberta a toda a poboación.

Nova entrega da tertulia dos venres en COPE O Carballiño, a deste 12 de decembro de 2025, desta vez con Fátima Gómez, Manuel Nogueira, Gonzalo Rodríguez e Sebas Lamazares.

Presenta e modera, Xan Pinal. Escóitaa aquí:

A Asociación O Carballiño Centro Comercial Aberto (Carballiño CCA) presentou a súa campaña de Nadal máis ambiciosa ata o de agora: “En Nadal Carballiño CCA ten premio!”, que se desenvolverá do 11 ao 30 de decembro. Trátase dunha iniciativa pensada para dinamizar o comercio local, atraer clientes á vila e ofrecer propostas de ocio, diversión e ilusión para todas as idades durante as festas de Nadal.

Segundo explican desde a directiva do CCA, “esta campaña supón un impulso ao comercio de proximidade nun período clave de consumo; apostamos por accións que combinen promoción comercial, participación cidadá e actividades familiares para encher as rúas e escaparates de maxia e vida”.

Sorteo con 4.000 € en vales de compra

Un dos grandes atractivos da campaña será o sorteo de 4.000 € en vales de compra, repartidos da seguinte maneira:

1 premio de 1.000 € 1 premio de 500 2 premios de 250 €
10 premios de 100 € 20 premios de 50 €

Os clientes que realicen as súas compras nos establecementos asociados ao Carballiño CCA recibirán papeletas de participación por cada compra realiada nos establecementos adherisdos á campaña.

O gran sorteo celebrarase o 30 de decembro ás 21:00 h na Praza Maior, nun acto aberto ao público que estará acompañado dunha gran festa de Nadal con chocolatada para todos os asistentes.

Actividades con Papá Noel e dinamización de rúa
Como parte da programación festiva, Carballiño CCA organizou a visita de Papá Noel, que estacionará o seu tranvía na Pista Roxa o 22 de decembro (11:30–13:30 / 17:00–20:30) e posteriormente na Praza Maior os días 23 (11:30–13:30 / 17:00–20:30) e 24 de decembro (11:30–13:30), para recibir as cartas dos máis pequenos e repartir ilusión e sorpresas.

Ademais, todos os establecementos asociados recibirán un elemento decorativo especial para as súas portas, co que se busca crear un ambiente festivo uniforme por toda a vila e felicitar as festas aos clientes que visiten os comercios locais.

Un Nadal cheo de vida e ilusión

O presidente do Carballiño CCA, Julián Garriga, salientou que “o obxectivo desta campaña é enchernos de actividade, de vida nas rúas e apoiar ao noso comercio local nun momento fundamental, como é o período de Nadal, no que as familias e veciños buscan experiencias e produtos únicos no seu entorno máis próximo”.

Pola súa banda, Noelia Mares, xerente da asociación, engadiu que “deseñamos esta campaña para recoñecer a fidelidade de quen aposta polo consumo local, e tamén para ofrecer propostas de lecer e diversión para as familias, facendo destas datas unhas verdadeiras festas en Carballiño”.
Cofinanciación e colaboración

A campaña conta coa cofinanciación da Xunta de Galicia, a través da Consellería de Emprego, Comercio e Emigración, a colaboración do Concello de O Carballiño e coa implicación dos propios establecementos asociados, que fan posible unha programación diversa e participativa para toda a poboación.

O Carballiño CCA anima a todos os veciños e visitantes a participar, desfrutar das actividades e apoiar o comercio de proximidade, facendo que o Nadal na vila sexa un tempo de encontro, ilusión e consumo responsable.

A área de Normalización Lingüística do Concello do Carballiño, en colaboración coa Concellería de Comercio, impulsa este Nadal unha campaña de compras no comercio local a través de frases en galego. Deste xeito, repartiranse entre os establecementos do municipio 2.000 autocolantes con temática de Nadal e cunha inscrición en lingua galega para que os comerciantes os poidan colocar nos paquetes de agasallos das festas.

A campaña pretende impulsar a presenza social do galego, achegándoo a espazos de uso habitual e grande visibilidade como os establecementos comerciais. “É un xeito de normalizar o emprego da lingua en situacións cotiás para que tanto a veciñanza como os visitantes perciban o galego como unha lingua útil, moderna e plenamente incorporada á actividade económica”, detalla Lorena Castro, concelleira de Educación.

“Tamén é unha campaña que apoia ao comercio de proximidade, xa que lle ofrecemos ferramentas atractivas para mellorar a presentación dos seus produtos nunha época de moita actividade como é o Nadal”, explica Diana González, edila de Comercio.

Aqueles comerciantes interesados en sumarse á campaña poden recoller os autocolantes ata fin de existencias nas oficinas de Normalización Lingüística no segundo andar da Casa Consistorial (en horario de 9,00 a 14,00 horas). Os establecementos adheridos ao CCA Carballiño poden solicitarllos á xerencia da entidade comercial, quen se encargará de repartilos entre os asociados.

A primeira hora desta tarde de martes a Garda Civil informou o achádego do cadáver de Manuela Conde, a muller veciña de Casfigueiro no concello de Piñor e de 73 anos de idade, que levaba desaparecida desde o pasado dia 16 de novembro no lugar de Rubillón, no concello de Avión, onde se encontraba de visita familiar.

A Garda Civil de Beariz ven de confirmar que o cadáver encontrado esta mañá é o desta muller. Foi o seu fillo quen a localizou nunha paraxe montañosa nas inmediacións la localidade de Acevedo, no mesmo concello de Avíón.

O Grupo Provincial do PP instará ao Goberno de Sánchez a mellorar o deficiente servizo de Correos que se presta na nosa provincia, a través dunha moción que levarán ao vindeiro pleno do mes de decembro.

Trátase dun novo recorte do Goberno Central contra o medio rural que se suma ao peche de cuarteis, á redución de frecuencias necesarias do AVE a Madrid, á centralización na cidade das competencias en materia de violencia de xénero en detrimento dos xulgados comarcais, entre outras moitas cuestións que están a privar á nosa veciñanza de servizos básicos e que contribúen ao seu desmantelamento.

A portavoz do Grupo Provincial do PP, Patricia Torres, acompañada polos representantes sindicais María Paz Saavedra de CC.OO. e Juan Carrera de C.G.T., e por representantes municipais populares, presentaron hoxe, na oficina de Correos da Derrasa do Pereiro de Aguiar, os detalles desta iniciativa que denuncia a falta de persoal, o atraso na entrega da correspondencia e a acumulación de envíos.

“Unha vez máis temos que poñer en evidencia o maltrato e a desidia do Goberno Central coa provincia de Ourense, desmantelando o servizo de Correos no rural e precarizando o traballo do persoal”, afirmou Patricia Torres, quen insistiu na importancia deste servizo nunha provincia “como a nosa cunha alta porcentaxe de poboación envellecida e cunha gran dispersión xeográfica”. Por elo, desde o Grupo Provincial do PP “non imos calar ante os constantes ataques silenciosos pero reais do Goberno de Sánchez contra a nosa provincia”, engadiu a voceira popular.

Pola súa parte, a representante sindical María Paz Saavedra reivindicou que desde ambos sindicatos "vimos denunciando o deterioro de servizo que se presta desde Correos na provincia, sobre todo, nun rural como o noso tan disperso, con moita montaña, cunha climatoloxía adversa e os traballadores pola falta de contratación e previsión non dan chegado a toda a cidadanía”

A problemática fundamental é, segundo María Paz Saavedra, “a falta de contratación de persoal” que repercute no servizo que se presta, exemplificando en que ás veces, “hai que pechar unha oficina para poder abrir outra, polo tanto, cremos que isto non é apostar polo rural”.

O concelleiro do Pereiro de Aguiar, Manuel Doval afirmou que esta é “unha mostra máis de como o Goberno de Sánchez defende o rural: retirando servizos esenciais que no caso particular deste concello, se pechan esta oficina, veranse privados deste servizo tan importante máis de 7.000 habitantes”.

Por todo elo, desde o GPP proponse instar ao Goberno de España a repoñer os postos de traballo vacantes para solucionar o problema de persoal e a cancelar o peche de oficinas e suprimir días de reparto na nosa provincia.