A comarca do Carballiño e máis en concreto o concello de San Cristovo de Cea xa contan cunha das súas localidades entre os pobos máis bonitos de España, Oseira ven de incoporarse á "Asociación Pueblos máis Bonitos de España".

A comisión de calidade, encargada de avaliar minuciosamente as candidaturas que recibe a asociación ao longo do ano e de realizar visitas técnicas aos pobos que xa pertencen á rede para verificar que seguen cumprindo os estándares esixidos, resolveron favorablemente a incorporación de catro novas localidades repartidas por toda a xeografía española, como foi o caso de Oseira e Vilanova dos Infantes, que se suman a Castro Caldelas, as tres únicas localidades da provincia de Ourense.

A "Asociación Pobos máis Bonitos de España" destaca que "Oseira é coñecida por albergar o Mosteiro de Santa María, un dos grandes referentes do Císter en España. Este conxunto monumental, construído entre os séculos XII e XVI, impresiona pola súa sobriedade arquitectónica e a súa relevancia histórica. O pequeno núcleo que o rodea intégrase nunha serena paisaxe de montaña, conformando un destino onde espiritualidade e beleza natural danse a man".

A Asociación "Pobos máis Bonitos de España", que reúne a 122 localidades en 2024, naceu co obxectivo de dar a coñecer pobos únicos pola súa beleza, o seu patrimonio e a súa identidade cultural. Baixo una mesma marca de calidade, a rede impulsa accións de promoción e actividades culturais dentro e fóra de España, contribuíndo así ao desenvolvemento sostible do medio rural.

Integrada na Federación dos Pobos máis Bonitos do Mundo, a iniciativa española forma parte dun movemento internacional presente en Francia, Italia, Suíza, Bélxica ou Xapón, entre outros países. Desde a súa creación en 2010 e a súa presentación oficial en 2013 con só 14 pobos, a rede creceu ata converterse nun referente nacional e internacional de prestixio e excelencia.

O Concello do Carballiño acende a iluminación de Nadal o próximo luns, 1 de decembro, para dar inicio á época máis máxica do ano. A vila contará cun total de 220.000 luces LED e, como novidade, nove enclaves da vila terán decoracións especiais para desfrute da poboación. “Ampliar a iluminación redunda nun maior número de visitas e, polo tanto, na dinamización do comercio e da hostalaría locais”, apunta Diego Fernández, concelleiro de Cultura.

Deste xeito, ademais da iluminación de Nadal, a Praza Juan Corral Paxariño contará cun xardín con bonecos de neve; na Praza de Abastos haberá un xardín con soldadiños de chumbo; a Praza do Concello terá un trineo con renos; a Praza Emilia Pardo Bazán contará cunha carruaxe con agasallos; na Praza Irmáns Prieto colocaranse os buzóns dos Reis Magos; o Balneario terá piruletas de Nadal; na rúa Ourense haberá un boneco de xenxibre; a Uceira estará decorada cun reno con agasallos, e na Veracruz estará a casiña de Laponia de Papá Noel.

O acendido da iluminación suporá o inicio da programación de Nadal impulsada pola Concellería de Cultura, que inclúe propostas musicais e teatrais para todas as idades. A próxima actividade é o concerto “Las guerreras K-Pop”, que se levará a cabo o xoves 4 de decembro no Auditorio Municipal.

Escoita aquí a tertulia deste venres dia 28 de novembro, coa participación nos estudos de COPE O Carballiño de Fátima Gómez, Manuel Nogueira, Gonzalo Rodríguez e Sebas Lamazares, moderados por Xan Pinal.

Trátase dunha publicación promovida pola Agrupación Local do PSdeG-PSOE, e na que o historiador carballiñés Carlos Montes fai unha aproximación aos grandes persoeiros e persoeiras da vida política e social do Carballiño desde 1835 en adiante, e que foron represaliados en distintos momentos históricos.

Aquí podes escoitar a entrevista en COPE O Carballiño na que Montes fala do seu traballo de investigación histórica:

A Policía Local do Carballiño inicia unha campaña de concienciación entre a veciñanza para dar a coñecer a normativa sobre Vehículos Personais Lixeiros (VPL) -patinetes eléctricos, bicicletas con asistencia, segways e similares-, que entrará en vigor o 1 de xaneiro de 2026.

Os axentes reforzarán nas próximas semanas os controis sobre este tipo de vehículos co obxectivo de garantir a seguridade viaria e mellorar a convivencia de peóns e conductores nas rúas do Carballiño. Nese sentido, cabe destacar que a Policía Local xa denunciou e retirou varios patinetes nos últimos meses por non cumplir coa actual normativa.

O uso de VPL é cada vez maior entre a poboación, o que está a causar certas dificultades de convivencia en estradas, beirarrúas e zonas peoniles. A campaña da Policía Local permitirá achegar a conductores e peóns información sobre as obrigas dos VPL a partir de xaneiro, tales como circular unicamente pola calzada, contar cun seguro de responsabilidade civil, respetar as sinais de tráfico e os semáforos, utilizar chalecos reflectantes en condicións de pouca visibilidade ou non circular baixo os efectos do alcohol ou de substancias estupefacientes.

Os axentes tamén revisarán que os VPL conten co correspondente certificado de uso, o que asegura que cumpre as normas de homologación e que pode circular polas vías públicas. Ata o de agora xa se detectaron varios vehículos comprados como patinetes eléctricos pero que polas súas características eran ciclomotores, o que obriga a contar dun permiso de condución AM para poder utilizalos.

O Festival Internacional de Curtametraxes Xociviga pecha con éxito de participación de público a segunda edición desde o cambio do formato impulsado en 2024. De mércores a sábado, o Auditorio Manuel María do Carballiño acolleu a proxección de 32 curtametraxes de 22 nacionalidades que foron valoradas polo xurado e polos espectadores. A organización do festival recolleu ao longo das 9 sesións máis de 500 papeletas do voto do público, o que dá conta da boa resposta por parte da poboación.

Os directores artísticos, os irmáns Mario e Daniel Fernández Filloy, valoran moi en positivo os datos de participación acadados nesta segunda edición, tanto nas proxeccións coma nas actividades paralelas. “Xa estamos pensando na edición do ano que vén, que promete seguir amosando as mellores curtas internacionais e sumando asistentes nun certame que recuperou o seu lugar como evento cultural de relevancia no Carballiño e na rede de festivais de cinema galegos”, apuntan.

Pola súa parte, o concelleiro de Cultura, Diego Fernández, pon en valor o traballo realizado polos directores e dá conta da importancia deste tipo de festivais para o concello. “É un orgullo que O Carballiño acolla obras inéditas a nivel estatal e galego, incluso estreas mundiais como ‘As maos da pulpeira’, que levará o nome do Carballiño por festivais de todo o mundo”, explica.

As proxeccións incluíron a estrea de 18 curtas internacionais en Galicia e 4 en España. O edil tamén destaca o papel do festival para os novos creadores e creadoras, que o valoraron “moi en positivo” como plataforma para dar a coñecer o seu traballo.

Curtametraxes premiadas

Mellor videoclip: “Equilibrar” (Hugo Guezeta e Guadi Galego) dirixido por Adrián Diaño.

Mellor dirección de fotografía xove patrocinada por Rc Service: Aaron Vilariño por “Romance de la Luna Luna” de Jimena Herrero

Mellor curta Xénese patrocinada por Gadis: “Furia” de Fran Moreno e Santi Pujol Amat. Mención de Honra: El príncipe Nigeriano de Marcel Sespulgues.

Mellor curta galega patrocinada por Rc Service: ·Algo novo que contar· de Paula Pereira.

Premio do público: ·Les dernières neiges” de Sarah Henochsberg (cun 8'68).
Mellor curta internacional Xentes: “Nothing Happens After That” de Ibrahim Omar.

Mencións de honra para de Marta Reis Andrade e "The Man Who Could Not Remain Silent" de Nebojša Slijepčević.

O palmarés desta segunda edición conta con seis filmes premiados. “Equilibrar” (Hugo Guezeta e Guadi Galego), dirixido por Adrián Diaño, resultou vencedor na categoría de mellor videoclip con 204 votos a través de redes sociais.

Aaron Vilariño levouse o galardón a mellor dirección de fotografía xove por “Romance de la luna luna” de Jimena Herrero.

“Furia”, de Fran Moreno e Santi Pujol levouse o premio a mellor curta Xénese, na que tivo mención de honra “El príncipe Nigeriano” de Marcel Sespulgues.

“Algo novo que contar”, de Paula Pereira, resultou gañadora na categoría de mellor curta galega. “Les dernières neiges”, de Sarah Henochsberg levouse o premio do público, que lle otorgou un 8,68.

Por último, “Nothing Happens After That” de Ibrahim Omar gañou o premio a mellor curta internacional Xentes. “Cao Sozinho” de Marta Reis Andrade e "The Man Who Could Not Remain Silent" de Nebojša Slijepčević.

A Deputación de Ourense pon en marcha a campaña “En soidade, non esperes máis”, unha iniciativa destinada a visibilizar e concienciar á cidadanía sobre a realidade diaria das persoas que padecen soidade non desexada, así como sobre o impacto que esta situación ten na saúde e no benestar.

A campaña enmárcase na recente advertencia realizada pola Organización Mundial da Saúde (OMS), cuxa Comisión de Conexión Social alerta sobre os profundos efectos do illamento social durante todo o proceso de envellecemento. A OMS lembra que a saúde social é un piar fundamental —e moitas veces ignorado— do benestar integral, tan esencial como a saúde física e mental.

Segundo o organismo internacional, a conexión social reduce o risco de enfermidades, prolonga a esperanza de vida e reforza o tecido das comunidades, dotando ás persoas de significado vital e dun profundo sentido de pertenza. Pola contra, a soidade non desexada constitúe un grave problema de saúde pública global, cunha prevalencia e unhas consecuencias severas que están sendo subestimadas.

TERnadal: termalismo para conectar e acompañar no Nadal

Para dar resposta a esta realidade, a Deputación de Ourense impulsa a iniciativa piloto TERnadal, un programa que permitirá que un milleiro de persoas participen en estancias termais durante o mes de decembro co obxectivo de combater a soidade non desexada.

O programa está dirixido a persoas que se atopen en situación de vulnerabilidade emocional ou que vivan soas, con independencia do seu lugar de residencia, e que desexen compartir as festas en compañía.

As estancias, de seis ou quince días de duración, desenvolveranse en distintos hoteis-balneario da provincia e incluirán aloxamento en pensión completa; acceso a piscinas de auga mineromedicinal; dúas técnicas termais diarias; actividades específicas para favorecer a socialización e consulta médica opcional.

Ademais, programáronse quendas especiais en días sinalados —Nadal, Fin de Ano e Reis— para garantir que ningunha persoa teña que vivir estas datas en soidade.

Toda a información e o proceso de solicitude están dispoñibles na web oficial: https://www.termalismourense.com/ternadal

Un compromiso da Deputación coa saúde social

Co lanzamento desta campaña e da iniciativa TERnadal, a Deputación de Ourense reafirma o seu compromiso cos coidados, o benestar e a atención ás persoas máis vulnerables. A institución provincial destaca que a loita contra a soidade non desexada require respostas innovadoras, humanas e coordinadas, nas que o termalismo, un dos recursos identitarios da provincia, se converte tamén nun espazo de encontro, acompañamento e esperanza.

O Concello do Carballiño conmemora o 25N, Día Internacional da Eliminación da Violencia de Xénero, cunha programación que aposta pola música e o teatro para concienciar á poboación.

No acto de presentación, Diego Fernández, concelleiro de Cultura, recordou o compromiso do goberno local coa erradicación da violencia machista e puxo en valor o papel das profesionais do Centro de Información á Muller (CIM): “O traballo do CIM durante todo o ano é fundamental para protexer e asesorar ás mulleres”. O edil tamén animou á veciñanza a denunciar todo tipo de violencia de xénero e lamentou o aumento do acoso a través das redes sociais, para o que pediu “tolerancia cero”.

A programación céntrase na propia xornada do 25N, o próximo martes, que arrancará ás 12,00 horas no salón de plenos coa lectura do manifesto institucional por parte da concelleira de Igualdade, Silvia Baranda. O acto, presentado por Chus Otero, contará coa presencia dos centros educativos do Carballiño, así como de colectivos como Aspadisi, Cruz Vermella, Asdifica ou asociacións de mulleres. “Contaremos co grupo As Riscadeiras, composto por mulleres, e coa actuación musical de Marta Bravo, veciña de Seoane, xunto con Sérgio Tannus”, destacou Fernández.

O venres 28 de novembro, a programación continuará co espectáculo teatral “Corazón” da actriz Iria Sobrado, nada no Carballiño. A performance terá lugar na Praza de Abastos ás 12,00 horas. A mesa de coordinación para a mellora de atención ás vítimas de violencia de xénero, o día 12 de decembro, completa a programación. A reunión permitirá analizar a realidade actual do Carballiño en materia de violencia machista, así como os retos pendentes.

Diego Fernández tamén fixo fincapé na importancia de traballar coas novas xeracións. Nese sentido, recordou o proxecto “Conectade@s” da Asociación Aliad Ultreia, realizada o pasado 10 de novembro co alumnado do IES Chamoso Lamas. “É moi necesario seguir traballando coas novas xeracións, porque así traballamos para lograr un futuro mellor”, apuntou.